Saloh Tyerri Anrini ortda qoldirdi

"Liverpul" futbolchisi Muhammad Saloh Angliya Premyer-ligasida bir klub safida eng ko‘p golda ishtirok etgan futbolchiga yaqinlashdi.

Payshanba kuni 32 yoshli forvard "Lester"ga qarshi o‘yinda (3:1) bitta gol urdi. Misrlik futbolchining "Liverpul" uchun Premyer-ligada gol va golli uzatma tizimi bo‘yicha 250 ochkosi bor. "Qizillar"ning hujumkor yetakchisi "Arsenal" safida 249 ta gol va golli uzatmaga ega bo‘lgan afsonaviy Tyerri Anrini ortda qoldirdi. Fransiyalik futbolchi 258 o‘yin o‘tkazgan bo‘lsa, Saloh 267 o‘yinda maydonga tushdi.

Reytingda faqat Ueyn Runi ("Manchester Yunayted", 276 gol va golli uzatma), Rayan Giggz ("Manchester Yunayted", 271) va Xarri Keyn ("Tottenxem", 259) yuqoriroqda.