Van Deyk: "Liverpul" bilan yangi shartnomam haqidagi xabarlar haqiqatga to‘g‘ri kelmaydi"

"Liverpul"ning 33 yoshli markaziy himoyachisi Virjil van Deyk kelasi yozda shartnomasi tugaydigan "mersisaydliklar" safidagi kelajagi haqidagi savolga javob berdi.

"Yangilik yo‘q. Siz bilan baham ko‘radigan hech narsam yo‘q. Agar erishilgan kelishuvlar yoki ularning yo‘qligi haqidagi yangiliklarni o‘qisangiz, bularning hech biri haqiqat emas. Albatta, muzokaralar olib borilmoqda, ammo hozir menda baham ko‘radigan hech narsam yo‘q", - dedi niderlandiyalik futbolchi.

Joriy mavsumda van Deyk barcha musobaqalarda 17 ta o‘yinda ishtirok etib, ikkita gol va bitta golli uzatmani amalga oshirdi. Transfermarkt portalida berilgan ma’lumotlarga ko‘ra, futbolchining bozor qiymati 30 million yevroni tashkil qiladi.