"Barselona" Bundesliga yulduzlaridan biriga e’tibor qaratmoqda

Nemis jamoasi hujumchisi Umar Marmushning o‘yinini kuzatish maqsadida Yevropa Ligasi umumiy bosqichi 5-turidan o‘rin olgan "Midtyullann" - "Ayntraxt Frankfurt" (1:2) uchrashuvida "Barselona" vakillari hozir bo‘lishdi. Bu haqda Tipsbladet xabar bermoqda.

Manbaga ko‘ra, "Barselona" prezidenti Joan Laporta 36 yoshli Robert Levandovski o‘rnini bosa oladigan yangi hujumchi bilan shartnoma imzolamoqchi. Marmush ana shunday futbolchilardan biri sanaladi.

Joriy mavsumda Marmush barcha turnirlarda 18 ta uchrashuvda qatnashib, 15 ta gol va 11 ta golli uzatmani amalga oshirdi. Futbolchining klub bilan amaldagi shartnomasi 2027 yilning yoziga qadar tuzilgan. Transfermarkt portalida berilgan ma’lumotlarga ko‘ra, futbolchining bozor qiymati 40 million yevroni tashkil qiladi.