Anchelotti "Real"ning asosiy muammosini aniqlagan

"Real Madrid" bosh murabbiyi Karlo Anchelotti jamoa muammolariga yechim izlamoqda.

Bu mavsumda "Los Blankos" o‘tgan g‘alabali mavsumdagidek barqaror emas. Madridliklar La Liganing so‘nggi turida o‘z maydonida “Barselona”ga yirik hisobda mag‘lub bo‘ldi (0:4).

Turnir jadvalida "ko‘k-anorranglilar" bilan oradagi farq allaqachon to‘qqiz ochkoni tashkil qilmoqda.

Relevo xabariga ko‘ra, Anchelotti vaziyatni sinchkovlik bilan tahlil qilib, hozirgi "Real"ning asosiy muammosi himoyaviy o‘yin degan xulosaga kelgan.

Xususan, manba qayd etganidek, italiyalik murabbiy jamoa pressingini yaxshilash uchun muqobil yechimlarni qidirmoqda.