Palmer qanday summa evaziga "Chelsi"dan ketishi mumkinligi ma’lum bo‘ldi

Londonning "Chelsi" klubi yarim himoyachisi Koul Palmer klubini o‘zgartirishi mumkin. Bu haqda OAV xabar bermoqda.

Yarim himoyachi xizmatlariga "Manchester Siti" qiziqish bildirmoqda. "Shaharliklar" rahbariyati angliyalik futbolchini ushbu mavsum yakunida jamoani tark etishi mumkin bo‘lgan belgiyalik Kevin de Bryuynega o‘rinbosar sifatida ko‘rmoqda. Angliya chempioni "aristokratlar"ga Palmerning transferi uchun 150 million yevro taklif qilishga tayyor.

Joriy Premyer-ligada 22 yoshli yarim himoyachi yettita o‘yin o‘tkazib, oltita gol va beshta golli uzatmani amalga oshirdi. Palmerning "ko‘klar" bilan shartnomasi 2033 yilning o‘rtalariga qadar tuzilgan.