Syurpriz-o‘yinchilar
APL mavsumi ortiqcha shov-shuvlarsiz odimlamoqda.
«Liverpul», «Manchester Siti» va «Arsenal» o‘tgan mavsum yakunidagidek sovrindor uchlikni band etishgan. Debyutantlar uchligi esa jadvalning so‘nggi 6 jamoasi orasida. Klublar ishtirokida e’tiborga loyiq shiddat yo‘qligi bois, alohida ijrochilar o‘yinlarini ko‘rib chiqib, kutilmagan natijalarga erishayotgan futbolchilar bilan tanishtirishni lozim topdik.
Liam Delap (hujumchi, «Ipsvich Taun»)
Bir necha yil muqaddam biz «Manchester Siti» tizimida tahsil olgan Rori Delapning o‘g‘liga jiddiy e’tibor qaratishga da’vat etgandik. Avvaliga u «Ipsvich» tarkibida atigi 2 marta maydonga tushgan bo‘lsada, uni «shaharliklar»dan 15 mln. funtga xarid qilish klub mutasaddilariga malol kelmadi. Liamning bahosi yozda 20 millionga ko‘tarilishi uning joriy mavsumdagi ishtirokiga bog‘liq.
Nima bo‘lganda ham, «Ipsvich» uchun kelishuv chakki emas. 21 yoshli hujumchi startdagi 10ta o‘yinda 5ta gol urdi. Agar jamoa elitadagi o‘rnini boy berib qo‘ymasa, bunga Liamning sermahsulligi evaziga erishgan bo‘ladi. Yosh hujumchi 4ta gol uchun 11ta zarbani amalga oshirdi va samaradorlik bo‘yicha 10tadan ko‘proq urinishlardan foydalangan futbolchilar orasida 3-natijani qayd etdi.
Tayler Dibling (yarim himoyachi, «Sautgempton»)
«Avliyolar» ham «Ipsvich» kabi mavsumni muvaffaqiyatli boshlay olmadilar. Lekin Rassel Martin jamoasida 18 yoshli Dibling ajoyib o‘yin ko‘rsatmoqda. Joriy mavsumga qadar u atigi bir marta zaxiradan maydonga tushgandi. «Sautgempton» safidagi ilk golini Tayler o‘tgan oyda «Ipsvich» darvozasiga urdi. Bundan tashqari, «MYU»ga qarshi o‘yinda jamoasi uchun penalti ishlab berdi. Ma’lumotlarga ko‘ra, golli vaziyatlarni yaratish bo‘yicha (7ta) Dibling - APL yetakchisi.
Jon Duran (hujumchi, «Aston Villa»)
Olli Uotkinsning o‘rinbosari bo‘lgan Duran har gal zaxiradan tushib, o‘zining mahoratini namoyish etmoqda. 20 yoshli hujumchi biror marta boshlang‘ich tarkibda tushmagan holda, APL doirasida 4ta gol urdi. Shundan 3tasi «Vest Xem», «Lester» va «Everton»ga qarshi bellashuvlar taqdirini hal qildi. Darvoqe, yosh iqtidorning «Bavariya»ga urgan goli ham YECHLda jamoasiga g‘alaba keltirdi. Jon «Villa»ni jonlantirmoqda.
Rayan Gravenberx (yarim himoyachi, «Liverpul»)
Tayanch yarim himoyachisiga ehtiyoj sezgan «Liverpul» yozda Martin Subimendiga xaridor bo‘lgandi. Biroq futbolchi «Real Sosyedad»ni tark etishni istamadi. Endi hammasi «qizillar» uchun xayrli kechayotgandek, ularga Subimendi kerak emas. Chunki Arne Slot davrida Gravenberx yangi fazilatlarini yuzaga chiqarmoqda. O‘tgan mavsumda Yurgen Klopp 22 yoshli niderlandiyalikni 12ta o‘yinda maydonga tushirgandi. Hozir u asosiy tarkib o‘yinchisi maqomida hujumkor uslub tashkilotchisi rolini ado etmoqda. U «qizillar»ning startdagi 10 o‘yinda 8ta va YECHLdagi 3ta g‘alabasiga sezilarli ulush qo‘shdi.
Raul Ximenes (hujumchi, «Fulxem»)
2022 yilning martidan 2023 yilning noyabriga qadar 33ta uchrashuvda birorta gol ura olmagan meksikalik tajribali hujumchini ko‘pchilik hisobdan chiqarib qo‘ygandi. Tabiiyki, asosiy vazifasini ado eta olmagan futbolchi uchun bu ulkan halokatga teng. O‘sha davrda Ximenes «Vulverxempton» va «Fulxem» klublari tarkibida to‘p surdi. 33 yoshli hujumchi joriy mavsumda sport formasini tiklashga muvaffaq bo‘lib, 10ta o‘yinda 4ta gol va 1ta samarali uzatmani amalga oshirdi.
Shuni ham unutmaslik kerakki, yaqin o‘tmishda Raul jiddiy sinovlarni boshdan kechirdi. 2019/2020 yillar mavsumida u chempionat doirasida 17ta golni rasmiylashtirgandi. Biroq 2020 yil noyabrida uning bosh suyagida nafaqat faoliyati, balki hayoti uchun o‘ta xavfli bo‘lgan darz paydo bo‘lgani aniqlanib, 8 oyni muolajalar bilan o‘tkazdi. Shunday ekan, Ximenesning hozirgi sermahsulligi u uchun ulkan muvaffaqiyat bilan barobar.
Riko Lyuis (himoyachi, «Manchester Siti»)
Endigina 19ga chiqqan Lyuis «shaharliklar» va Angliya terma jamoasining muhim o‘yinchisi maqomiga ko‘tarilgani yuksak ko‘rsatkich. O‘tgan mavsumda Riko atigi 8ta uchrashuvda ishtirok etgan bo‘lsa, joriy mavsum startidagi 10ta o‘yinning 9tasida maydonga tushdi. Lyuis himoya chizig‘ining ikkala qanotida ishonchli to‘p suradi, Rodri og‘ir jarohatga duch kelgan paytda tayanch yarim himoyachisi rolini ado etdi. undagi universallik fazilati klub va terma jamoaga manfaat keltirishiga shubha yo‘q.
Noni Madueke (vinger, «Chelsi»)
«Aristokratlar» tarkibida o‘z o‘rnini topish osonmas. Madueke uzoq vaqt davomida e’tibordan chetda qolib ketdi. Lekin joriy mavsum uning anoyi emasligini isbotlamoqda. YELdagi «Servett»ga qarshi bellashuvdagi (2:0) goldan keyin Noni ajoyib o‘yinlari evaziga yetakchilarning biriga aylandi. Angliya terma jamoasida debyutini nishonlagach, «Vulverxempton»ga qarshi bahsda xet-trikni rasmiylashtirdi. Keyin «Nottingem Forest» darvozasini ishg‘ol etdi. Natijada Madueke APLdagi 9ta o‘yinda 4ta golni o‘z hisobiga yozib qo‘ydi. O‘tgan mavsumda u 23 marta maydonga tushib, 5ta gol urgandi.
Antuan Semenyo (hujumchi, «Bornmut»)
O‘tgan yil yanvarida Gana terma jamoasi hujumchisini o‘z safiga qo‘shib olish «Bornmut» uchun 10 mln. funtga tushgandi. APLning dastlabki 17ta o‘yinida Antuan atigi 2 marta raqib darvozasiga yo‘l topa olgandi. Endi esa chinakamiga ochilib, shiddatkor va chaqqon merganga aylandi. Hozirga qadar hujumchi «Nottingem Forest», «Everton» va «Sautgempton» jamoalarini o‘z darvozalaridan to‘p olib chiqishga majbur etdi. Shuningdek, «Siti» ustidan qozonilgan chiroyli g‘alabada birinchi golni urdi va qudratli «Arsenal»ga qarshi bahsda raqib himoyachilarini chalg‘itish bilan g‘alabaga muhim hissa qo‘shdi.
Sodiq SOBIR tayyorladi
