“Manchester Yunayted” 380 kun ichida ilk bor yevrokuboklarda g‘alaba qozondi

"Manchester Yunayted" yevrokuboklardagi g‘alabasiz seriyasiga chek qo‘ydi.

"Qizil iblislar" Yevropa ligasi doirasidagi o‘yinda o‘z maydonida Gresiya PAOKni mag‘lub etdi (2:0). Har ikki gol muallifi 50 va 77-daqiqalarda gol urgan Amad Diallo bo‘ldi.

"Manchester Yunayted" bir yildan ko‘proq vaqt davomida - 380 kundan beri Yevrokuboklarda g‘alaba qozona olmayotgandi. Mankunianliklarning Yevropa arenasidagi avvalgi g‘alabasi 2023 yilning 24-oktyabr kuni bo‘lib o‘tgan – o‘shanda ular Daniyaning "Kopengagen" klubini mag‘lub etgan (1:0).

Angliya grandi to‘rt turdan so‘ng 6 ochko bilan Yevropa Ligasi umumiy turnir jadvalida 15-o‘rinda bormoqda. Bungacha "Yunayted" "Tvente" (1:1), "Portu" (3:3) va "Fenerbaxche" (1:1) bilan durang o‘ynagandi.