"Yunayted" umididan Yevropada qayta tug‘ilishgacha bo‘lgan yo‘l
Meyson Grinvud - «MYU» tarbiyalagan eng navqiron iqtidorlardan biri.
U «qizil iblislar» safidagi o‘ta shiddatli faoliyati bilan qisqa vaqt ichida klub va ingliz futbolining kelajagi porloq vakili maqomiga erishdi. Quyidagi hikoyamiz Grinvudning Manchesterga yo‘l olishi, «Xetafe»ga ijaraga yuborilishi va «Marsel»ga o‘tishi haqida.
Akademiyadagi bolalik yillari
Meyson Uill Jon Grinvud 2001 yilning 1 oktyabrida G‘arbiy Yorkshirning Bredford shahrida dunyoga keldi. Juda kichik yoshidayoq hayron qolarli darajada futbolchilik qobiliyatini namoyish etgan bolakay 6 yoshida «MYU» akademiyasidan joy oldi. Grinvud o‘z tengqurlari orasida nafaqat jismoniy jihatlari, balki ikkala oyog‘ida to‘pni yaxshi olib yurishi bilan ajralib turardi.
Akademiyada Grinvud barcha yosh toifalarida yetakchi maqomida shug‘ullanib, 16 yoshida 18 yoshlilar jamoasida to‘p sura boshladi va o‘zining gollari bilan ko‘pchilik e’tiborini qozondi. Ayniqsa, markazda ham, qanotlarda ham sermahsul to‘p surishi kuchli taassurot qoldirdi.
Asosiy jamoadagi debyuti
Meyson Grinvud o‘zining «MYU»dagi debyutini 2019 yilning 6 martida, YECHL doirasidagi «PSJ»ga qarshi bahsda nishonladi. Tarixiy uchrashuv maqomini olgan o‘sha o‘yinda «qizil iblislar» ajoyib kambek evaziga g‘olib chiqishdi (3:1) va chorak finalga yo‘l olishdi. Grinvud esa turnirda maydonga tushgan eng yosh futbolchi sifatida professional futbolga qadam qo‘ydi.
2018|19 yillar mavsumi ham hujumchining jumladan, APLdagi ishtiroki tufayli muxlislarda yorqin taassurot qoldirdi. Undagi qat’iyat va o‘smirga xos bo‘lmagan yetuklik chindan ham ajablanarli hol edi.
2019|20 yillar
mavsumidagi shiddatli o‘sish
Asosiy tarkibdan mustahkam joy olgan futbolchi Ule Gunnar Sulsher rahbarligida 49 marta maydonga tushib, 17ta gol urdi. Ayniqsa, uning YELdagi tajribali o‘yinchilarga xos sovuqqonlik bilan harakatlanishi yorqin iz qoldirdi.
Grinvudning alohida jihatlari:
1. Ikkala oyoqlaridagi zarbalar. Grinvud o‘ng oyog‘ida ham, chap oyog‘ida ham aniq zarba yo‘llaydi. Bu esa raqib himoyachilarini gangitib qo‘yadi.
2. Tezlik va dribling. O‘zining texnik mahorati va to‘pni nazorat qilishi evaziga Meyson yakkama-yakka vaziyatda raqiblarini osonlikcha aldab o‘tadi.
3. Hujumlarni yakuniga yetkazish qobiliyati. Maydonning qaysi hududida bo‘lishidan qat’iy nazar, Grinvud kerakli paytda qayerga qanday yetib borishni doimo yaxshi biladi.
Ana shu ijobiy xislatlari tufayli Meyson «MYU»ning hujum chizig‘ida Markus Reshford, Antoni Marsyal va Brunu Fernandesh kabi taniqli futbolchilar yonidan joy oldi.
2020|21 yillar mavsumi
Keyingi mavsumda Grinvud rivojlanishni davom ettirdi. Startda ayrim kamchiliklarga yo‘l qo‘ygan bo‘lsada, yakuniy bosqichda 12ta gol urdi va murakkab vaziyatlarda mas’uliyatni o‘z zimmasiga olishini namoyish etdi.
Yevropa Ligasi
Meyson Grinvud faoliyatining eng yorqin o‘yinlarini YEL turnirida namoyish etdi. Garchi uning jamoasi finalda «Vilyar-real»dan yengilgan bo‘lsada, Meyson eng yaxshi to‘purarlar safida e’tirof etildi.
Muammolar va faoliyatidagi uzilish
2022 yil avvalida hujumchi jiddiy qiyinchiliklarni boshdan kechirdi. Qonunbuzarlikka oid ayblovdan keyin uni jamoa tarkibida maydonga tushishini taqiqlab qo‘yishdi. O‘sha davr futbolchining o‘zi va jamoasi uchun juda og‘ir o‘tdi. Suddagi surishtiruv ishlari davom etishiga qaramasdan, muxlislar navqiron iqtidorni qo‘llab-quvvatladilar va tezroq jamoaga qaytishini kutdilar. Uzoq davom etgan surishtiruvdan keyin Grinvudga qarshi ayblov bekor qilindi. Lekin uning «MYU» safiga qaytishi jamoatchilik va ayrim matbuot manbalarining asossiz bosimlari tufayli juda qiyin kechdi.
«Xetafe»dagi ijara faoliyati
2023|24 yillar mavsumida «MYU» mutasaddilari Grinvudga sport formasini tiklab olish va Angliyadagi asossiz bosimdan forig‘ bo‘lish imkoniyatini berish maqsadida uni Ispaniyaning «Xetafe» klubiga ijaraga berishdi. Mazkur yechim o‘yinchining o‘zi va klubi uchun muhim ahamiyat kasb etdi.
Grinvud o‘ta qisqa vaqt ichida yangi jamoaga moslashib oldi. La Liganing taktika bobida APLdan farqli ekanligi Meysonning talab darajasida to‘p surishiga to‘sqinlik qila olmadi. Bir necha gol va assistlarni rasmiylashtirgan hujumchi oldingi chiziqning turli nuqtalarida samarali to‘p surib, jamoaning muhim o‘yinchilaridan biriga aylandi. «Surgun» Meysonga o‘yin amaliyotiga ega bo‘lish va o‘ziga bo‘lgan ishonchni tiklash imkoniyatini berdi.
«Olimpik Marsel» tarkibiga o‘tish
«Xetafe»dagi muvaffaqiyatli ijaradan keyin Grinvud kutilmagan, lekin mantiqan to‘g‘ri to‘xtamga keldi - Fransiyaning nomdor klublaridan biri bo‘lmish «Marsel» sari yo‘l oldi va Angliyadan tashqaridagi faoliyatida dastlabki qadamini qo‘ydi.
Yangi jamoada Meyson hujumkor chiziqning vakili sifatida Liga 1 va yevrokubok musobaqalarida o‘z salohiyatini namoyish eta boshladi. Undagi tezlik, yuksak mahorat va hujumni nihoyasiga yetkazish qobiliyati o‘z samarasini berdi. «Marsel» safidagi o‘yinlar ta’sirida u salbiy his-tuyg‘ulardan xalos bo‘ldi. Shuningdek, yana o‘zini qit’aning navqiron iqtidorlari safiga qaytgandek seza boshladi.
Jamoaga va kelajakka ta’siri
Meyson Grinvud - kasbdoshlaridan yaqqol ajralib turadigan noyob iqtidor va salohiyatga ega futbolchi. Uning «MYU», «Xetafe» va «Marsel»dagi o‘yinlari qiyinchiliklarni yenggan holda o‘sib borayotganidan dalolat beradi. Kelajakda u har qanday jamoada yetakchi maqomida maydonga tushib, jahon miqyosidagi yulduz ekanligini eslatib qo‘yishi mumkin.
«MYU» tarkibidagi faoliyatida hujumchi 130 marta maydonga tushib, 30dan ortiq gollar urgandi. Endi Meyson «Marsel»da shonli tarixni davom ettirmoqda. Uning yo‘li yorqin lahzalar va jiddiy sinovlarga to‘la. «Xetafe»dagi ijara va «Marsel»da Meyson yangi imkoniyatlarini namoyish etdi. Yaqin kelajakda Grinvudni qit’a futbolining eng yorqin yulduzlari safida ko‘rsak, ajabmas.
S.RAHMONOV tayyorladi
