Van Deyk: "Bu o‘yindagi muhim lahza bo‘ldi"

Virjil van Deyk "Tottenxem"ga qarshi o‘yinda hakamlik xatosi bo‘lganini aytdi.

"Liverpul" Liga kubogi yarim finalining birinchi o‘yinida 0:1 hisobida mag‘lub bo‘ldi va yagona gol 86-daqiqada Lukas Bergvall tomonidan kiritildi.

Bundan biroz avval sariq kartochka olgan shved futbolchisi "qizillar" himoyachisi Konstantinos Simikasga nisbatan qo‘pollik ishlatgandi. Bergvall gol urganida grek hali maydonga qaytmagandi.

"Menimcha, bu ikkinchi sariq kartochka ekanligi aniq edi. Ammo bir daqiqadan so‘ng Bergval g‘alaba golini kiritdi.

Menimcha, hakam xato qildi, men ham unga aytdim. U buni xato deb hisoblamaydi, lekin menimcha, bu butunlay barchaga ravshan ko‘rinib turgan edi.

Laynsmen bor, to‘rtinchi hakam, VAR hakamlari bor, lekin u ikkinchi sariq kartochkani cho‘ntagidan chiqarmadi.

Bugungi mag‘lubiyatga asosiy sabab shu bo‘ldi demayman, lekin bu o‘yindagi muhim lahza bo‘ldi", dedi “Liverpul” himoyachisi.