Arteta "Arsenal"ga kelganiga 5 yil to‘ldi

Ispaniyalik Mikel Arteta roppa-rosa besh yil avval Londonning “Arsenal” klubi bosh murabbiyiga aylangandi. U 2019 yilning 20 dekabrida boshqa ispaniyalik murabbiy Unai Emeri o‘rnini egallagan.

O‘shandan beri "Arsenal" Angliya kubogini qo‘lga kiritdi va ikki marta, 2020 va 2023 yillarda Angliya Superkubogini yutdi. Shuningdek, Arteta qo‘l ostidagi "kanonirlar" "Manchester Siti"ga qarshi kurashda chempionlikdan bir qadam qolganda ikki marta Premyer-liga turnir jadvalida ikkinchi o‘rinni egalladi.

Arteta tayinlanishidan oldin "Manchester Siti"da Pep Gvardiolaning murabbiylar shtabida ishlagan. Futbolchi sifatida ispaniyalik 2011 yildan 2016 yilgacha “Arsenal”da besh yil o‘ynagan.