«El-klasiko» chiptalari narxi ma’lum bo‘ldi
La Ligadagi «el-klasiko» uchun eng arzon chipta 130 yevro turadi.
La Liganing 11-turidan o‘rin olgan «Real» - «Barselona» uchrashuvi 26 oktyabr kuni «Santyago Bernabeu»da bo‘lib o‘tadi.
«Real Madrid» o‘zining rasmiy saytida o‘yin uchun chiptalar qachon sotuvga chiqarilishi haqidagi ma’lumotlarni joylashtirdi. Dastlab, 21 oktyabr kuni klubning premium toifadagi muxlislari chiptalarni xarid qilishlari mumkin bo‘lsa, 22 oktyabrda qolgan chiptalar keng jamoatchilikka taqdim etiladi.
Oddiy tribunalardagi o‘rindiqlar narxi eng arzon chipta uchun 130 yevrodan eng qimmati uchun 455 yevrogacha. VIP zonalar uchun chiptalar narxi 850 yevroni tashkil qiladi.
Eslatib o‘tamiz, «Real»ning 22 oktyabr kuni «Santyago Bernabeu»da bo‘lib o‘tadigan Chempionlar ligasi doirasidagi «Borussiya»ga qarshi o‘yiniga chiptalar ancha arzon. Eng arzon chipta 75 yevro, VIP chiptalar esa 350 yevrodan boshlanadi.
