«Real»ning Qatarga parvozi uch soatga kechiktirildi
«Real» samolyotdagi nosozlik tufayli Qit’alararo kubok finaliga parvozni kechiktirdi.
Jamoaning Dohaga reysi uch soatga ortga surildi, chunki havo kemasining yuk bo‘limida nosozlik aniqlangan. Parvozni qoldirish va boshqa samolyotga o‘tish haqida qaror qabul qilindi.
Madridliklar chorshanba kuni bo‘lib o‘tadigan kubok finalida Meksikaning «Pachuka» jamoasiga qarshi o‘ynaydi.
Yangi rejaga ko‘ra, jamoa bugun kechqurun Qatarga yetib boradi. Madridliklar final o‘yini o‘tkaziladigan «Lusail» stadionidan 18 kilometr masofada joylashgan mehmonxonadan o‘rin olishadi.
2022 yilgi Jahon chempionati finali o‘tkazilgan ushbu stadionda har ikki jamoaning mashg‘ulotlari va Karlo Anchelotti hamda bir futbolchining matbuot anjumanlari bo‘lib o‘tadi.
Hozirgi rejaga ko‘ra, jamoa finaldan keyinoq Madridga qaytib, payshanba kuni ertalab yetib boradi. Yakshanba kuni esa «Real» o‘z uyida La Liga doirasida «Sevilya»ga qarshi o‘ynaydi.
