Messi MLS tarixida hali hech kim qilmagan ishni bajardi

«Inter Mayami» hujumchisi Lionel Messi MLS muntazam chempionatining navbatdagi o‘yinida «Nyu-Inglend Revolyushn»ga qarshi o‘yinda (6:2) zaxiradan maydonga tushdi.

Argentinalik futbolchi 58-daqiqada maydonga tushdi va 78, 81 va 89-daqiqada raqiblar darvozasiga to‘p kiritib, xet-trik qayd etishga muvaffaq bo‘ldi. 37 yoshli superyulduz o‘z nomiga assist ham yozdirib qo‘ydi. "MLS Communication" ma’lumotlariga ko‘ra, Messi MLS tarixida zaxiradan maydonga tushganidan so‘ng 3+1 golda ishtirok etgan birinchi futbolchi bo‘ldi.

Lionel MLS 2024 da 19 uchrashuvda 20 ta gol urdi va 17 ta golli uzatmani amalga oshirdi.