"Manchester Yunayted" va "Liverpul" uchrashuvning boshqa muddatga qoldirilishi haqidagi xabarlar ortidan bayonot berishdi
"Liverpul" va "Manchester Yunayted" kuchli qor tufayli Angliya Premyer-ligasining 20-tur uchrashuvi bekor qilinishi mumkinligi borasida rasmiy bayonot berdi. O‘yin bugun, 5 yanvar kuni Liverpulda bo‘lib o‘tishi kerak.
"Bugun ertalab "Manchester Yunayted" bilan "Enfild"dagi bugungi o‘yin uchun ob-havo va sayohat sharoitlarini baholash uchun xavfsizlik yig‘ilishi bo‘lib o‘tdi.
Ushbu bosqichda uchrashuv odatdagidek o‘tishi rejalashtirilgan va uning o‘tishi uchun barcha imkoniyatlar ishga solinmoqda.
Tushda joriy sharoitlarni baholash uchun yana bir xavfsizlik yig‘ilishi bo‘lib o‘tadi", - deyiladi "Liverpul" bayonotida.
"Manchester Yunayted" bu bayonotga javoban o‘yinga borishni rejalashtirayotgan muxlislarni ehtiyot bo‘lishga chaqirdi.
Uchrashuv Toshkent vaqti bilan 21:30da boshlanishi rejalashtirilgan.
