Olmo va Viktor "Barselona" qaydnomasidan chiqarib tashlandi
"Barselona" Dani Olmo va Pau Viktorni ro‘yxatdan o‘tkaza olmadi.
Avvalroq sud ikki marta "Barselona" futbolchilarini mavsumning ikkinchi yarmi uchun ro‘yxatdan o‘tkazishni rad etgandi. "Kamp Nou"dagi VIP o‘rindiqlarni sotish bo‘yicha kelishuv tasdiqlansa, ular ro‘yxatdan o‘tishlari kutilgandi.
Biroq, La Liga kataloniyaliklar birorta futbolchini ro‘yxatdan o‘tkaza olmagani haqida bayonot berdi.
"La Liga ma’lum qiladiki, 31 dekabr holatiga ko‘ra, "Barselona" liganing iqtisodiy nazorati qoidalariga muvofiq, 2025 yil 2 yanvardan boshlab istalgan o‘yinchini ro‘yxatdan o‘tkazishga ruxsat beruvchi hech qanday muqobil variantni taqdim etmagan", — deyiladi liganing bayonotida.
Bugun, 1 yanvar kuni La Liga Olmo va Viktorni mavsum uchun ro‘yxatdan o‘tgan "blaugrana" futbolchilari ro‘yxatidan olib tashladi. Shu bilan birga himoyachi Andreas Kristensen ro‘yxatga qo‘shildi, uning jarohati tufayli "Barsa" Olmoni mavsumning birinchi qismida ro‘yxatdan o‘tkaza olgandi.
Kecha "Barselona" Olmo va Pau Viktorni Ispaniya futbol federasiyasiga ro‘yxatdan o‘tkazish uchun ariza topshirdi. Ushbu murojaatning natijasi hozircha noma’lum.
Olmo ro‘yxatdan o‘tmagani uchun endi u erkin agent sifatida jamoani tark etish huquqiga ega. Shu bilan birga, yarim himoyachining agenti ispaniyalik futbolchi klubda qolishga qaror qilganini aytdi.
