"Nottingem Forest" - APLda mavsum kashfiyoti

29 dekabr kuni "Nottingem Forest" Angliya Premyer-ligasining 19-turida safarda "Everton"ni mag‘lub etdi. Uchrashuv 2:0 hisobida yakunlandi.

Ushbu g‘alaba "o‘rmonchilar" uchun Angliya chempionatining joriy mavsumida ketma-ket beshinchi g‘alaba bo‘ldi. Klub matbuot xizmatining xabar berishicha, ular bilan bunday holat 1995 yildan beri birinchi marta yuz bergan.

O‘tgan besh turda "Nottingem Forest" "Manchester Yunayted" (3:2), "Aston Villa" (2:1), "Brentford" (2:0), "Tottenxem" (1:0) va "Everton" (2:0) ustidan g‘alaba qozondi. Eslatib o‘tamiz, jamoa 3 ta o‘yinda o‘z darvozasidan to‘p o‘tkazib yubormadi.

"Nottingem Forest" - APLning joriy mavsumining haqiqiy kashfiyoti. Ayni paytda Nunu Eshpiritu Santu shogirdlari 37 ochko bilan turnir jadvalida ikkinchi o‘rinni egallab turibdi.