Zidan kelajagi borasida bir qarorga kelgan
“Real Madrid” klubining sobiq murabbiyi, fransuz mutaxassisi Zinedin Zidan o‘z kelajagi borasida bir qarorga kelgan.
AS nashrining xabariga ko‘ra, Zidan faqatgina Fransiya terma jamoasi bilan ishlashni ko‘zlamoqda. U 2022 yil Qatardagi Jahon chempionatidan so‘ng Fransiya terma jamoasini boshqarishni rejalashtirgan edi, biroq murabbiy Didye Desham o‘z lavozimida qolgan. Xabarda aytilishicha, hozirda Zidan Madridda yashamoqda va faqat Fransiya terma jamoasidan taklif kutmoqda.
Eslatib o‘tamiz, Zinedin Zidan klub darajasida faqat “Real” bilan ishlagan. U jamoani 2016—2018 va 2019—2021 yillarda boshqargan. Murabbiy “Qirollik klubi” bilan ikki karra Ispaniya chempioni, ikki karra Ispaniya Superkubogi sohibi va uch karra Chempionlar Ligasi g‘olibiga aylangan.
Avvalroq Fransiyaning “PSJ” klubi murabbiy xizmatlaridan foydalanish niyati borligi haqida xabar qilingandi.
