Ayollar o‘rtasidagi Yevropa chempionatining mukofot jamg‘armasi oshiriladi

UEFA ayollar o‘rtasidagi Yevro-2025 uchun mukofot jamg‘armasini oshirdi.

Ayollar o‘rtasidagi Yevropa chempionati 2025-yilning 2-iyulidan 27-iyuliga qadar Shveysariyada bo‘lib o‘tadi.

UEFA Ijroiya qo‘mitasi bo‘lajak turnir uchun mukofot jamg‘armasini 41 million yevro miqdorida tasdiqladi - bu 2022 yilga nisbatan 156 foizga ko‘p.

Turnirda ishtirok etuvchi barcha 16 jamoa 1,8 million yevro miqdorida kafolatlangan to‘lovni oladi.

Jamoalar har bir durang uchun 50 ming yevro va guruh bosqichidagi g‘alaba uchun 100 ming yevro, shuningdek, pley-offning har bir keyingi bosqichiga chiqqani uchun bonuslar oladi. Yevropa chempionati g‘olibi guruh bosqichidagi barcha o‘yinlarda g‘alaba qozonish sharti bilan maksimal 5,1 million yevro olishi mumkin.