Rafinya YECHLning 4 ta o‘yinida 7 ta golda qatnashishga ulgurdi

"Srvena Zvezda"ga qarshi o‘yinda Rafinya Dias ikkita golli pas berdi.

"Barselona" vingeri Chempionlar ligasi umumiy bosqichi 4-tur uchrashuvining 13-daqiqasida hisobni ochgan Inigo Martinesga uzatma berdi. Shuningdek, taym yakunida Robert Levandovski aynan braziliyalik futbolchining zarbasidan so‘ng ustunga tegib qaytgan to‘pni darvozaga kiritdi.

Joriy Chempionlar ligasida Rafinya 4 uchrashuvda 4 ta gol urdi va 3 ta golli uzatmani amalga oshirdi. Umuman olganda, braziliyalik futbolchi joriy mavsumda "Barselona" safida 16 ta o‘yinda maydonga tushib, 11 ta gol va 9 ta golli uzatmani amalga oshirgan.